Welkom by Hoërskool Rustenburg!

 

VOORWOORD

Wat sien jy as jy na ‘n boom kyk?  ‘n Meubelmaker sien meubels, ‘n vioolmaker sien viole, ‘n skeepsbouer sien skepe.  ‘n Onderwyser by die Hoërskool Rustenburg, ook bekend as die Boomskool, sien hoe ‘n wonderwerk besig is om te gebeur: ‘n kind word ‘n pragtige boom wat vrug gaan dra vir die gemeenskap.

In die Hoërskool Rustenburg se wapen is ‘n wildevyboom.  Net soos die wildevyboom vas en trots staan, sy wortels diep geanker in hierdie aarde en sy takke wyd uitgesprei vir koelte en kos vir voëls en diere, staan die Hoërskool Rustenburg ook vasgeanker in die tradisie en prestasies van die verlede en reik ons uit na die toekoms.

Indien daar na die wildevyboom gekyk word, kan in verwondering gevra word:  “Hoe hoog kan ‘n boom groei?”  Die vraag is eintlik:  “Wat is jou en my doel op die aarde?”  Ophelia het in Shakespeare se Hamlet gesê:  “ Lord we know what we are, but we know not what we may be.”

Die uitdaging vir die onderwys is juis die ontsluiting van die kind se potensiaal.  Dit is waarom die skool die volgende visie het:  “Ontsluit volle potensiaal deur kwaliteit opvoeding om ‘n onafhanklike jong volwassene die wêreld in te stuur”. 

Hoe ontdek die kind sy potensiaal?  Die geheim lê in die skool se leuse:  “Nosce te ipsum”  -  Ken jouself.  Dit beteken dat hy/sy moet deelneem aan soveel aktiwiteite moontlik en sy/haar prestasie teenoor die prestasies van ander deelnemers moet meet. 

Die jong wildevyeboomkind moet die volgende eienskappe hê: 

  • Elke boom het ‘n penwortel wat hom moet anker en wat noodsaaklik is vir sy ontwikkeling.  Ons, as die Boomskool, se penwortel is geanker in die grond van tradisie en Christelike waardes.  Dit is die kernwaarde van die skool.  Ons gee die ereplek aan God en Sy Woord en strewe Christelike lewensbeginsels na. 
  • Die stam moet stewig staan teen aanslae van buite – ‘n ware landmerk in die omgewing.  Indien dit gebeur, sal die volgende woorde van die skoollied waar word:  “...eer en roem moet jy versamel vir jou skool en dorp alom; nie alleen in jongelingsjare maar tot gryse ouderdom.”
  • Die takke moet sterk en stewig in wind en weer wees om die “aanhou tot prestasie” en “genot van deelname” te simboliseer.
  • Die boom se blarekleed van geloof, hoop en liefde moet skadu en veiligheid aan menige soekende mense verskaf.
  • Natuurlik word die boom aan sy vrug geken – daarom sal die boom oortrek wees met akademiese-, sport- en kultuurvrugte.

Wat is die onderwysers se rol in die ontwikkeling van die boompie? 

Christa McAuliffe, die eerste onderwyser in die ruimte (sy was in die Challenger ruimtetuig wat na 73 sekondes in die lug ontplof het)  het gesê: “I touch the future. I teach”.  Ons sê ook: “Ons weet ons raak die toekoms aan.  Ons is ‘n onderwysers en ons is trots daarop!”

Die onderwyser is die tuinier wat moet sorg dat die plantjie groei. ‘n Ware tuinier is iemand met ‘n grondbesmeerde oorpak wat met vereeldte hande liefderyk in die grond werskaf, sy plantjies versorg en trots kyk hoe die boompie groei en vrug dra.  John Maxwell skryf die volgende:  “To be all I can be, I need to help you be all you can be.”

Wat ‘n voorreg om deel te wees van die groeiproses hier by die Boomskool.  Wat ‘n voorreg om betrokke te wees by ‘n skool waar jy in jou moedertaal Sy Naam onbeskaamd kan aanroep.  Wat ‘n voorreg om te deel in die Here se vreugde as Hy die vrug van elke boompie beskou…

Dankie aan die Skepper dat Hy aan die personeel en kinders van die Boomskool ‘n wildevyboom gegee het.  Dit maak nie saak hoe warm dit op enige oomblik is nie, ék staan in die koelte van Die Boom.

Hoe hoog kan ‘n boom groei? 

‘n Boom groei tot sy volle potensiaal bereik is...

 

 

 

Terug Terug na bo